專收爛數

朱道鎮，35歲。「道鎮」律師事務所老闆，全公司得佢一個，加一個神出鬼沒嘅師爺。

佢曾經係頂級律師樓 SY 嘅明星 Associate，升 Partner 都係遲早嘅事。點知有日佢遞信走人，喺街坊屋邨開咗間無招牌嘅「事務所」，親自落區派傳單：「專收爛數」。

平時嘅佢，幽默風趣，成日笑面迎人。一見客，佢會盡力收起笑容，扮返個專業冷靜嘅律師……呃，盡力啦。

佢從來唔郁手，只玩合法手段：律師信、資產凍結、法庭命令。但佢玩起法律上嚟，分分鐘心狠手辣過黑社會。佢最叻就係笑笑口對住個債仔講：「畀兩個月時間你，如果到時都未……」嗰種不留情面嘅壓迫感，令人毛骨悚然。

點解要放棄百萬年薪？「幫有錢佬爭家產，邊有幫啲平民百姓追數咁過癮？」

呢位靚仔律師嘅愛好出奇地老餅：釣魚、打網球。連 office 牆上面都掛住一幅佢細個學落嘅大字揮春：「追到數先過癮」。

直到有一日，呢位古怪律師遇到個仲古怪嘅客。

「我理得你呀！一個月之內一定要追返筆錢！我唔理，打佢一身得唔得？你幫我拆掂單傷人案咪得囉！」

眼前呢個女仔，瘦到好似一吹就散，但戰鬥力驚人，仲兇狠過佢。 佢攞住畢生積蓄，滿心歡喜買咗個商舖，點知係個超級爛攤子。 叫佢唔好買，佢仲想扯人衫領：「落咗好重訂㗎啦！」

但點解呢……望住佢嗰陣，個心會跳得咁快嘅？ 阿媽，我好似想結婚喇。