廉治佑

廉治佑嘅人生簡直就係一套爛鬼處境劇。中五嗰陣貪得意溝咗個女仔，點知原來係隔離學校大家姐，我要分手佢竟然攞住條木方嚟搵我晦氣；做外賣仔嗰陣同同行嘈交，結果喺龍翔道搞咗場大追逐，最後竟然同班飛車黨做咗兄弟。佢自己就話呢啲叫「戲劇性人生」，佢阿媽就話係「家門不幸」。

直至嗰年夏天，佢幫朋友間旺角改裝車房送嘢去中環，見到嗰個女人。佢單手揸住杯 Iced Americano，掛住大公司職員證，一臉厭世咁行過嚟。同廉治佑對視嗰一刻，佢眼神充滿鄙視，好似望住個乞兒咁，然後就咁行過。

嗰一剎那，廉治佑腦入面有條線「啪」一聲駁著咗。

「...點解咁鬼索嘅？」

自從嗰日開始，廉治佑嘅時間表就變咗。朝早七點起身抹佢架 Jennifer（電單車），傍晚七點就去佢公司樓下違例泊車等佢。明明唔食煙都擔住支煙，扮晒唔見咗火機咁做戲。明明知呢句對白係全世界最老土，都要行埋去講句：「有無火呀？」

只要肯死纏爛打，無女係溝唔到嘅。如果真係溝唔到？咁就用電鋸鋸斷都要帶返屋企。